Linn T. Sunne: Happy (utdrag)

Hanna heitte den vesle grå. Venninna til Mathilde med
lys i ansiktet.
Hanna sat rett framfor meg i klasserommet, bøygde
nakken over matteboka. Tasta på ein kalkulator. Strauk
håret vekk.
Eg veit ikkje kva som var så spesielt med henne. Men
eg hadde bestemt meg - eg ville bli kjend med Hanna.
Det var lenge sidan eg hadde bestemt noko sjølv.
Vi la vekk mattebøkene, det var mat. Eg hadde kjøpt
niste på Esso i dag tidleg, ein mjuk bagett med kyllingkjøtt
og noko salatguffe.
Hanna snudde seg bakover mot meg, smilte. Alle
smilte til meg, snille smil. Litt for snille og stive, eg fekk
lyst til å sparke nokre av dei smila. Men eg heldt beina i
ro mens Hanna kikka på bagetten min.
- Er han god? spurde ho.
- Ikkje noko særleg.
Vibeke tok med seg magen sin og gjekk, vi sat att og
gomla, ein tom mjølkekartong flaug gjennom lufta. Eg
og dei tjueto.
Mathilde tok ei skei med yoghurt og kasta ut eit spørs -
mål til meg.
- Er det far din som er den nye dokteren?
Eg nikka, hadde akkurat tatt ein altfor stor bit. Kinna
bula ut.
- Mor di, da?
Eg hadde førebudd meg. Visste kva eg skulle svare.
Men orda som kom ut da eg hadde fått togge ferdig, var
andre enn dei eg hadde planlagt.
- Ho er i utlandet.
- Er foreldra dine skilde?
- Nei, ho berre arbeider der.
- Kor da?
Spørsmåla hagla, frå gutar og jenter, eg hugsa ikkje
namna på nokon av dei. Berre Hanna, og ho sat stille,
med ryggen mot vindauget. Ho såg mot meg, men sa
ikkje noko.
Eg fortalde. Om mor mi. Som arbeidde i New York.
Hadde leilegheit der, sidan ho var der så ofte. På Manhattan,
eg hadde vore der i sommarferien.
Eg fortalde. Om arbeidet hennar. Om kor slitsame
dagane som motefotograf kan vere. Om bortskjemde
modellar. Om kravstore arbeidsgivarar. Eg fortalde vel
det meste. Kanskje litt til.
Dei måpte, dei såg akkurat så dumme ut som eg
hadde håpt på. Stjernene vart tende i auga deira. Mote -
fotograf. New York. Supermodellar.
Dei stod rundt meg i friminuttet, lo og smilte. Ikkje
så stive no lenger. Eg sparka litt i grusen likevel.

Linn T. Sunne

Linn T. Sunne er fødd i 1971 og er oppvaksen på Kongsberg og i Valldal på Sunnmøre. Ho bur no på Dokka, og arbeider med litteraturformidling for barn og ungdom på bokbussen i Oppland.